تكسير نصب تذكارى لشهداء انبا صموئيل
مفيش حد فينا ممكن ينسى تفاصيل يوم استشهاد ابطالنا شهداء انبا صموئيل و ازاى الامن وصل بعد ٥ ساعات و الاسعاف بعده ب٣ ساعات و مسئولى مدينة العدوة وصلوا اخر اليوم.
من يومين مجموعة من الشباب الخدام فى دير انبا صموئيل انهم يخلدوا ذكرى الشهداء و جمعوا قرشين من بعض و بجهود ذاتية عملوا ٣ رخامات عليهم اسماء الشهداء و لوحتين معدن بيحكوا القصة و مكتوب عليهم تمجيد للشهداء.
كان هدفهم عمل نصب تذكارى يعرف الناس مكان الحادث و يخلد الحادث فى اذهان الناس وبالفعل اخدوا الحاجة و راحوا عملوا دوائر حول مكان الاستشهاد وكان منظر رائع لفت انظار زوار الدير و انهى الشباب عملهم الساعة ١١:٣٠
الساعة ١:٣٠ كان رئيس جهاز مدينة العدوة ومعاه قوة ازالة و امر ازالة مختوم "ده كله فى ساعتين زمن" و وصلوا لمكان النصب التذكارى و ازالوه.
السيد المسئول مش عايز اى شئ يذكره بتقصر حكومته بس الشباب مكنوش يقصدوا ده هما بس قصدهم تذكير الناس بالشهداء و تخليد ذكراهم وذكرى عظمة شهادتهم للمسيح.
يا سيادة المسئول احنا عارفين ان التقصير منكم بيكون بمزاجكم "غالبا" غصب عنكم "نادراً" لكن صدقنى شبابنا مكنوش يقصدوا يفكروكم بعار التقصير.
نقلا عن صفحة Ramy Kamil على الفيس بوك